Imaxe: MANU BOUTUREIRA.
Coa súa xornada particular de pausa xa superada, o Deportivo Liceo de Stanis García regresará á OK Prata para un partido de etiqueta: un dos derbis coruñeses ante o Compañía de María (sábado 20, 20:00h). O primeiro do curso celebrarase no Polideportivo de Elviña 2 e significará a volta do actual líder do Grupo Norte, cuxo último encontro disputou o pasado 6 de novembro (vitoria por 6-1 ante o Espanyol).
O filial masculino gañou os catro partidos que disputou ata o de agora, sendo o único da competición en logralo. Conta cunha vantaxe de tres puntos con respecto ó Dominicos e o Mataró, segundos e terceiros con nove. Máis dificultades está a vivir o Compañía, actual penúltimo da táboa con tres unidades froito dun único triunfo.
O mes de novembro do Grupo Norte rematará para o Liceo o día 27, momento no que recibirá ó Jolaseta. Decembro deixará tres encontros en total fronte a Rochapea, Vendrell e Dominicos antes do parón de Nadal.
