7 de xuño de 2024
Imaxe: MANU BOUTUREIRA.
O equipo de Juan Copa saca o ADN Liceo para superar ó Noia e forzar o cuarto encontro, que será o domingo 9 ás 12:00h. Riazor será novamente o escenario.
O Liceo está moi vivo. As semifinais continuarán o seu rumbo o próximo domingo (12:00h) en Riazor despois de que o terceiro partido deixase un contundente triunfo dos homes de Juan Copa.
Superaron ó Noia de principio a fin e mantiveron en pé a súa candidatura ó título da OK Liga, a pesar do difícil camiño que aínda queda por diante. En caso de nova vitoria verdibranca, a eliminatoria regresaría o martes a Sant Sadurní para a proba definitiva.
Declaración de intencións con feitos
Fronte a un Pazo preparado para apoiar, os encargados de saír á pista sabían perfectamente que facer. Había que gañar e, polo tanto, ser ambiciosos desde o primeiro segundo. Dava Torres e César Carballeira, no sétimo e no oitavo minuto, foron os responsables de poñer por diante ó Liceo por partida dobre. 2-0 grazas ós dous grandes goleadores verdibrancos durante todo o curso.
Un bo comezo que non daba nada por sentado. O Noia, vencedor nos dous primeiros choques das semifinais, demostrou o seu perigo constantemente. Ata que tamén o materializou no marcador. Xavi Costa recortou distancias no minuto 12 (2-1) e avisou ós presentes.
Non foron 25 minutos precisamente aburridos nin nese aspecto nin no das tarxetas, xa que Humberto Mendes deixou ós visitantes en inferioridade numérica temporal tras unhas airadas protestas ante os dous árbitros. Os de Juan Copa aproveitaron esa circunstancia co 3-1, obra de Fran Torres nun gol moi seu. Xogada de ataque, bóla solta e remate oportunista dentro da área.
Dava Torres (3) e César Carballeira (2) comandaron de novo ó Liceo noutra noite para recordar
Desafortunadamente non foi o resultado que chegou ó descanso, xa que inmediatamente despois apareceu o 3-2 do exliceísta Jordi Bargalló. Sería unha anécdota.
A mesma liña para pechar o partido
Nada de que preocuparse. O Deportivo Liceo recorreu unha vez máis a unha arma que lle dá moi bos resultados: as saídas ambiciosas á segunda parte. De novo o marcador mostrou dúas boas novas para o equipo coruñés nada máis regresar á pista: no minuto 27 xa lograra dous goles. Primeiro atopouno Sito Ricart tras un ataque fulgurante e, posteriormente, César completou o seu dobrete cunha definición picada.
5-2 a favor, aínda que con 23 minutos por diante. Non puideron estar mellor xestionados. Os ataques lóxicos do Noia, xa con máis risco debido ás circunstancias, foron correctamente detidos grazas á defensa e a Martí Serra. O porteiro liceísta volveu ser importante con varias intervencións de gran mérito, entre elas na directa que lanzou Gabarró.
Mentres, o Liceo gozou dun penalti, outra directa (ambos errados) e outros dous tantos. Ambos coa sinatura do capitán, que pechou o seu hat trick particular nunha gran noite tanto para el como para o dorsal 5. A cousa foi de coruñeses. Partido terminado con 7-2 e a pensar no seguinte.
FICHA TÉCNICA
DEPORTIVO LICEO: Martí Serra; Sito Ricart, César Carballeira, Dava Torres, Fabri Ciocale (quinteto inicial), Tomás Pereira, Pablo Cancela, Fran Torres, Bruno Saavedra e Tiago Rodrigues (meta suplente).
NOIA: Blai Roca; Aleix Esteller, Jordi Bargalló, Xavi Rovira, Iván Morales (quinteto inicial), Xavi Costa, Toni Salvadó, Martí Gabarró, Humberto Mendes e Jan Marimon (meta suplente).
ÁRBITROS: Sergi Mayor Oliván e Miguel Díaz Cosme. Mostraron tarxeta azul a Bruno Saavedra nos liceístas. Por parte do Noia viuna Humberto Mendes.
GOLES: 1-0 (Dava Torres, min. 7). 2-0 (César Carballeira, min. 8). 2-1 (Xavi Costa, min. 12). 3-1 (Fran Torres, min. 20). 3-2 (Jordi Bargalló, min. 20). 4-2 (Sito Ricart, min. 27). 5-2 (César Carballeira, min. 27). 6-2 (Dava Torres, min. 37). 7-2 (Dava Torres, min. 48).
OK Liga 23/24. Semifinais do playoff polo título, Partido 3. Pazo dos Deportes de Riazor (A Coruña).
