A diferenza de acerto volveu ser vital. Así foi no primeiro partido das finais e tamén no segundo. O Deportivo Liceo foi derrotado de novo no Palau por un Barça que aproveitou as súas ocasións para colocarse a un triunfo máis do título da OK Liga. A eliminatoria trasladarase o xoves 15 a Riazor (20:00h).
Con Bruno en lugar de Sito como novidade no quinteto inicial, o Deportivo Liceo viu como a sorte fuxía desde o principio. Só pasaron tres minutos ata que Hélder Nunes, cun disparo desde fóra da área, viu como a traxectoria tocaba nun defensor e despistaba a Martí Serra. Marcador con 1-0 en contra para comezar o encontro.
Non condicionou ós xogadores de Copa. Fortaleza mental e ataques dentro duns instantes inaugurais de auténtica ida e volta. O ritmo foi moi alto. En canto ós liceístas, o empate estivo a punto de chegar en dúas ocasións de Dava Torres: unha parada de Sergi Fernández a remate cercano e un poste tras internada polo costado esquerdo. Comezaba a exhibición do meta catalán.
Fortaleza mental e novo revés
Co ritmo máis establecido, o Barça avisou de novo. Nunha estratexia semellante á do gol de Bargalló no primeiro partido, o mesmo Pau non foi capaz de anotar. Tampouco Marc Grau e Sergi Llorca nos seus dous rexeites. O turno regresou ás filas coruñesas: un disparo potente de Pol con parada acrobática do meta e un cara a cara de Bruno Di Benedetto.
O meta Sergi Fernández xogou un colosal encontro
O Deportivo Liceo estaba totalmente establecido a pesar da derrota parcial cando a sorte volveu golpear para mal. A falta de dous minutos para o descanso, Rodrigues marcou o 2-0 tras aproveitar un rexeite.
Diferenza de acerto
Na segunda metade, máis do mesmo. Os verdibrancos continuaron atacando pero sufriron a un Sergi Fernández colosal e chave na vitoria azulgrana. Pol e César probárono ó volver á pista antes de que Pau Bargalló si acertara. No minuto 34, cunha xogada moi semellante á de Dava polo costado esquerdo, conseguiu introducir a bóla na meta de Serra.
Un Martí que tamén completou un partido excelente con ata catro directas detidas. Dúas foron practicamente seguidas: unha despois dunha tarxeta azul rigorosa ó capitán e outra ó cometer a décima infracción. Bargalló e Rodrigues foron as vítimas. Con todo, o exliceísta Marc Grau marcou o 4-0 no minuto 39. Outro golpe.
O gol da honra para o Deportivo Liceo chegou no minuto 45 mediante Bruno Di Benedetto. Avanzou pola esquerda, chegou á área, definiu e a bóla acabou entrando lentamente na meta dun Fernández que finalmente foi batido. De pouco serviu máis que para maquillar o marcador.
FICHA TÉCNICA
BARÇA: Sergi Fernández; João Rodrigues, Ignacio Alabart, Pau Bargalló, Hélder Nunes (quinteto inicial), Joan Pascual, Sergi Panadero, Marc Grau, Sergi Llorca e Carles Grau (meta suplente).
DEPORTIVO LICEO: Martí Serra; Bruno Di Benedetto, César Carballeira, Dava Torres, Àlex Rodríguez (quinteto inicial), Sito Ricart, Pol Manrubia, Fabri Ciocale, Fran Torres e Mati Bridge (meta suplente).
ÁRBITROS: Jonathan Sánchez García e Erik Rivas Martín. Mostraron cartón azul a Dava Torres e ó técnico Juan Copa por parte do Deportivo Liceo.
GOLES: 1-0 (Hélder Nunes, min. 3). 2-0 (João Rodrigues, min. 23). 3-0 (Pau Bargalló, min. 34). 4-0 (Marc Grau, min. 39). 4-1 (Bruno Di Benedetto, min. 45).
OK Liga 22/23, Playoffs polo título. Segundo partido da final. Palau Blaugrana (Barcelona).
